Festexando a diferenza

Podemos afirmar con rotundidade que o libro escrito por Iria Misa e ilustrado por Alba Barreiro, Mamá, quero ser Ziggy Stardust, tivo un gran éxito entre os compoñentes do club de lectura dos Benxamíns. A historia dun neno trans emocionou a máis dunha, e serviu tamén para comprobar que estas novas xeracións mostran unha tremenda empatía e aceptación da diversidade.

Ademáis disto, os membros do club tiveron a oportunidade de coñecer ao cantante David Bowie, gran transgresor e modelo de androxinia nos anos 70 do século XX. Na súa honra, todas fomos Ziggy Stardust.

Taller de clown para a pedagoxía das emocións

A adquisición de competencias foi un dos piares da LOMCE. Ás portas da LOMLOE e nun contexto de pandemia que está xenerando un novo escenario e novos retos, identificamos a necesidade de educar na adquisición da competencia emocional e no desenvolvemento da intelixencia emocional do noso alumando. No IES de Porto do Son somos conscientes de que é urxente incorporar ao noso traballo este ámbito do desenvolvemento persoal. Este é o obxectivo da nosa participación en EMOCIÓNA-T, un dos Contratos-programa Inclúe, ofrecido pola Consellería de Educación para o curso 2021/22.

Entre as actividades programadas, o alumnado de 1º, 2º e 3º de ESO, asistiu esta semana pasada a un taller de clown impartido por Alfredo Pérez Muíño, de N+1 Teatro Circo Danza.

Mais… que ferramentas ofrece un taller de clown para a pedagoxía das emocións? Que aportan as artes escénicas ao traballo docente?

Escoitar, observar, reparar no outro, berrar, calar, falar, abrazar, dar e darnos espazo, recoñecer e recoñecernos nos demais, respectar, estimarse, aceptar a frustración, empatizar, ter iniciativa e dispoñibilidade…

Un paso máis nas iniciativas que estamos a levar a cabo dende o inicio do curso: os nomes e os conceptos, as emocións no 25 de novembro, as emocións para querer querendo, as emocións nas lecturas recomendadas para 2022…

Imos enchendo o fardelo. Paseniño iremos acomodando os saberes e os sentimentos para afrontarmos con bos alicerces un presente, o 2022!, e un futuro que queremos libre, xusto e comprometido!

Guía de Nadal para ler no 2022

Semella que veñen tempos de coidarnos de novo, de sermos prudentes. Os libros volven ser bos compañeiros de viaxe para este tempiño de Nadal que nos dá un respiriño das angueiras do traballo e o esatudo. Esta é a nosa recomendación! Vai envolta nas emocións do cariño, as apertas e o sorriso! Nelas hai cómic, poesía, narración… Seguro que has de atopar algo que te acompañe! Acompaña na exposición á nosa árbore enfeitizada cunha chea de exposicións positivas: vida, aloumiño, aperta, deleite, calma, afouteza… :):)!!!

Xa sabes, activa o código QR e… recólleos na biblioteca ou mércaos nas librarías para agasallar ou agasallarte!

Boas lecturas e Bo Nadal! Os nosos mellores desexos e saúde para o 2021!