Setembro

O ano novo comeza en xaneiro, pero para moitos, esa renovación, esa volta á rutina, é sen dúbida en setembro. Este é o mes onde comezamos a desperezarnos despois do verán e con máis ou menos ganas, comezamos a rodar. E nisas estamos no club de lectura de adultos Fraga de Novio. Viñemos con ganas, coa xente de sempre, coa xente que volve despois dun tempo e con xente nova. Para outubro, agardaranos o Verán sen homes de Siri Hustvedt.

Semella que esta tempada pode ser como as anteriores, as prepandémicas. Ler en grupo sempre é un pracer.

Adeus á tempada

Rematou o curso, e con el, rematou a tempada do club de lectura de adultos. Foi un ano complicado, con xuntanzas co número reducido de asistentes, xuntanzas telemáticas,…e moita precaución! E pouquiño a pouquiño, levámolo adiante entre todas e todos.

De despedida, fixemos unha xuntanza diferente, ao aire libre. O xantar permitiunos falar do libro, O bosque das antas de Francisco X. Fernández Naval, e a ruta entre Seráns e Corrubedo, permitiu coñecernos mellor e desfrutar da fermosa costa do Porto do Son.

Igrexa de San Benito de Seráns
Praia de Seráns
Faro de Corrubedo

Agora toca descansar e aproveitar o tempo de vacacións para coñecer novas lecturas e cando chegue setembro, compartilas.

Isaac Díaz Pardo na Memoria

En agosto do 2020 cumpríanse 100 anos do nacemento dunha das persoas máis luminosas do noso século XX: Isaac Díaz Pardo. Pintor, ilustrador, escritor, empresario… e, ante todo, xunto con Luís Seoane, creador dun soño: o Laboratorio de Formas, unha idea feita realidade na que a arte, a economía, a memoria e a identidade como piares dunha Galicia posible.

Dende o equipo de biblioteca promovemos o traballo sobre Isaac e o seu labor dende diferentes materias. Perseguiamos estes obxecivos:

  • Poñer en valor o labor desenvolvido por Isaac Díaz Pardo e Luís Seoane no Laboratorio de Formas e a fábrica de Sargadelos. 
  • Poñer en valor do labor desenvolvido polos personaxes históricos representados na cerámica de Sargadelos.
  • Procurar información e a súa reelaboración.
  • Traballar en equipo.
  • Valorar o traballo interdisciplinario nun proxecto común entre varias materias: Lingua Galega, Lingua Castelá, Educación Plástica e Visual e Matemáticas.
  • Corrixir a expresión lingüística escrita.
  • Reforzar a utilización dos correctores en liña na produción textual. 
  • Reforzar a utilización do Classroom e o Drive para o traballo individual e colaborativo.

Plástica

Traballos de creación de figuras a partir das liñas de deseño (formais e de contido identitario) das figuras de Sargadelos:

1º, 2º e 3º de ESO

Lingua Galega

O alumando de 1º a 3º de ESO coñeceu a figura de Isaac Díaz Pardo a través de formularios web:

https://docs.google.com/forms/d/1kCbtL-RO3lXQite6Re2EW38hoLtGTtG98omgourJows/edit

https://docs.google.com/forms/d/1O1AFKEwbbZobrHtPEcGJb_AnitUTrfwMZ665bMQeRig/edit

En 1º e 2º de ESO, tirando da relación entre Isaac Díaz Pardo e Castelao, o diálogo entre texto e imaxe, e os cantares de cego creados por Isaac, propuxemos ao alumnado que crease cómics a partir das lecturas de Retrincos, Cousas e Cantares Gallegos. Nesta imaxe recóllese un exemplo dunha das tarefas que se adxunta a continuación como pdf.

Nesta entrada recollemos a actividade e os premiados por parte do EDNL e o equipo de biblioteca.

En 3º de ESO investigaron sobre A nosa historia nas figuras de Sargadelos e cos seus traballos creamos unha presentación recompilando a información. Poñendo en valor a nosa identidade!

En 2º de Bacharelato, contextualizouse a nunha tarefa do bloque de sociolingüística, tras a lectura de Instrucións para tomar café, de Núñez Singala. Estes relatos convidan á reflexión sobre a identidade galega e o uso da lingua galega en diferentes ámbitos e funcións, entre eles o empresarial. A tarefa sobre Isaac Díaz Pardo, ademais do cuestionario para coñecer o intelectual e o seu labor, constituíu a segunda parte do traballo a partir da obra de Singala. Debían reflexionar sobre o tema: Como somos os galegos? Como queremos ser os galegos? Dividíase en dous bloques: Mirando atrás e Pensando o presente para construír o futuro. Que mellor exemplo que Isaac Díaz Pardo e o Laboratorio de formas!

Pedíuselles que creasen un texto sobre o intelectual a partir da investigación de diversas fontes e que analizasen o uso do galego e os criterios identitarios nunha selección de empresas galegas actuais.

Entre os textos realizados polo alumando, en xeral ben interesantes, seleccionamos estes das alumnas Clara Tomé Mariño e Valeria Baleirón Sobrido:

Lingua Castelá

Na materia de Lingua Castelá en 4º de ESO responderon tamén un formulario para coñecer a Isaac Díaz Pardo e contextualizar a tarefa que consistiu na creación dun microrrelato a partir da obra pictórica do artista e empresario.

Entre os microrrelatos presentados, seleccionamos os creados por Silvia Pego e Indira Fernández Rodal a partir dos cadros Os afogados e O discurso:

Matemáticas

Dende o departamento de Matemáticas traballaron a xeometría a partir do deseños da cerámica de Sargadelos:

De Isaac Díaz Pardo, Castelao e Rosalía ao cómic!

Tanto Castelao como Isaac Díaz Pardo foron pintores e escritores. Os dous crían na necesidade de unir a imaxe e a palabra. Castelao fíxoo nos seus álbums (Nós, Milicianos, Galicia Mártir, etc.), na narrativa e no teatro

“— Non quero ir porque o escolante pégame e a escola cheira que fede”. Castelao. Álbum Nós, 1931. Primeira edición. 


Isaac Díaz Pardo fíxoo nos carteis de cego que publicou en 1970: Paco Pixiñas, O marqués de Sargadelos e A nave espacial. En 1985 adicou un á vida de Castelao.

Seguindo os seus pasos pedimos ao alumnado de 1º, 2º e 3º de ESO que crease cómics a partir dos relatos de Castelao de Retrincos e Cousas en 1º e 2º de ESO e dos poemas de Rosalía de Cantares Gallegos. Mirade nesta selección que ben o fixeron!!! Tan ben que os mellores recibirán do EDNL e da Biblioteca un cómic en galego como galardón. E os premiados foron:

1º ESO

1º A: Fabián Santos Cambón, “O segredo” e Érika Maneiro Santamaría, “Peito de lobo”. 1º C: Adrián González Queiruga, “Sabela”.

2º ESO

2º A: Águeda Dios Rego, ” A cova dos carcamáns”.

3º ESO

3º A: María Sanlés Suárez, “Nasín cando as prantas nasen” e 3º D: Nerea González Couza “Pasa, río, pasa, río”.

PARABÉNS!!!!!

Os booktrailers de O sol do verán

Achegamos unha selección dos booktrailers que realizaron os alumnos e alumnas de 2º de bacharelato sobre O Sol do verán de Carlos Casares, como actividade de biblioteca e da materia de Lingua Galega.

Vídeo de Rita Vila:

Vídeo de Laura Lojo:

Vídeo de Antonio Parada:

Vídeo de Clara Tomé:

La neblina del ayer

Despois de tantos meses, por fin nos puidemos reunir presencialmente na xuntanza do club de lectura de adultos, e desde logo, cumprindo co número máximo de persoas permitidas, e con todas as medidas de seguridade.

E como ler é a maior parte das veces viaxar, ata a Cuba de principio do século XXI nos fomos co libro La neblina del ayer, de Leonardo Padura. Este libro constitúe o sexto capítulo dunha serie coa mesma personaxe principal, Mario Conde, expolicía na cidade da Habana. O libro ten certos tintes de novela negra, levándonos aos barrios máis perigosos da cidade, onde existe un submundo que ao propio protagonista lle asombra a súa existencia.

A realidade cubana da “gran crise” aparece con toda a súa crudeza. E entre tanta penuria, viaxase ao pasado con certa nostalxia para revivir o explendor da Cuba dos anos 50, da súa vida nocturna, dos boleiros,…

Retornamos a Galicia na última lectura deste curso con Francisco X. Fernández Naval e O bosque das antas.

Cabalos e lobos

Unha bonita narrativa, rica en metáforas, compón o libro do xornalista vigués Fran P. Lorenzo Cabalos e Lobos, quinto libro deste curso no club de lectura de adultos.

Esta novela segue a vida do matrimonio alemá formado por Albert e Úrsula Beckmann, de como os seus negocios os levan a establecerse nun vibrante Vigo da primeira metade do século XX, dos seus descendentes e dunha historia que permanece oculta ata o final.

A homosexualidade ocultada, reprimida e perseguida durante a dictadura de Franco aparece moi ben descrita na novela. Tamén o nazismo do matrimonio Beckmann. Precisamente, relacionado coa Segunda Guerra Mundial, é interesante a mención ás trümmerfrauen, as “mulleres das ruínas”, mulleres que bloque a bloque, intentaban reconstruír a súa vida.

Ou por que a poesía ten menos lectores que a novela…

Resposta, atinada, provocadora, reflexiva… e moi ben escrita de Clara Tomé Mariño, de 2º de bacharelato:

Son consumidores serios de poesía os adictos a unha breve e perecedoira felicidade, inconformistas que con poucas liñas se conforman, unha especie en extinción á que ninguén protexe. Hoxe por hoxe a sociedade compóñena chimpancés sobreestimulados polas pantallas. Os emojis de corazóns e os “tk” substituíron ao Amor Cortés das cantigas medievais e levaron a que finalmente “se nubrase o sol eternamente”, a que “o mar se secase un instante” e que a “lapa do amor” de Bécquer se apagase de xeito indefinido. Cada vez menos xente fala de sentimentos e xa nin pola cabeza se nos pasa ler sobre eles en verso: son complexos e non entran nos nosos ilustrados cocos. A hermética e enigmática poesía tórnase difícil de descodificar se non se nos presenta en ceros e uns. Ás veces tamén resulta máis cómodo, aínda que sexa facer trampa, deixarlle a lectura da poesía ao nervio auditivo e non ao óptico: “The answer, my friend, is blowing in the wind” (Bob Dylan) ou “La vida es tan corta y el oficio de vivir tan difícil, que cuando uno empieza a aprenderlo, ya hay que morirse.” (Joaquín Sabina). E se lemos para evadirnos da realidade preferimos facelo durante o maior tempo posible; mellor que a fuga dure unha novela a que dure unha copla antes de ter que volver de novo ao cárcere. 

Carta ao 2021. Un ano de pandemia…

Esta semana cúmprese un ano do peche dos coles pola pandemia. A Covid-19 cambiou as nosas vidas: confinamentos, peches perimetrais, distancias, desinfección, apertas e bicos abeirados agardando poderen darse, medo… E tamén aprendizaxe, descubrir a importancia dos bos momentos, da liberdade do cotiá.

Dende o Departamento de Lingua Galega, o EDNL e a biblioteca, propuxemos en decembro ao alumnado escribir unha Carta ao 2021. Sumouse os curso de 1º, 2º, 3º de ESO e 1º de Bacharelato. De entre as cartas presentadas, seleccionamos dúas por nivel. A vida puxo atrancos no día a día das profes que o levamos e retrasamos a escolla. Cando o fixemos decidimos agardar ata esta semana para darlles ás alumnas e aos alumnos un pequeno galardón. Son Alexo Segade e Manuela Vázquez de 1º de ESO, Águeda Dios e Marta Cánive de 2º de ESO, Samuel Maneiro e Carlota León de 3º de ESO e María Rodríguez e Mariña Castelao de 1º de bacharelato. Parabéns!

Con estas cartas celebramos que resistimos, entre as correntes das fiestras abertas, as distancias nos corredores, as actividades en grupo anuladas, os protocolos estritos… PERO AÍ ESTAMOS, desexando que este 2021 sexa o ano en que recuperamos a LIBERDADE!

Dende o IES de Porto do Son para o 2021!!! Premede AQUÍ para ler os textos.

Carta ao 2021. Un ano de pandemia

Esta semana cúmprese un ano do peche dos coles pola pandemia. A Covid-19 cambiou as nosas vidas: confinamentos, peches perimetrais, distancias, desinfección, apertas e bicos abeirados agardando poderen darse, medo… E tamén aprendizaxe, descubrir a importancia dos bos momentos, da liberdade do cotiá.

Dende o Departamento de Lingua Galega, o EDNL e a biblioteca, propuxemos en decembro ao alumnado escribir unha Carta ao 2021. Sumouse os curso de 1º, 2º, 3º de ESO e 1º de Bacharelato. De entre as cartas presentadas, seleccionamos dúas por nivel. A vida puxo atrancos no día a día das profes que o levamos e retrasamos a escolla. Cando o fixemos decidimos agardar ata esta semana para darlles ás alumnas e aos alumnos un pequeno galardón. Son Alexo Segade e Manuela Vázquez de 1º de ESO, Águeda Dios e Marta Cánive de 2º de ESO, Samuel Maneiro e Carlota León de 3º de ESO e María Rodríguez e Mariña Castelao de 1º de bacharelato. Parabéns!

Con estas cartas celebramos que resistimos, entre as correntes das fiestras abertas, as distancias nos corredores, as actividades en grupo anuladas, os protocolos estritos… PERO AÍ ESTAMOS, desexando que este 2021 sexa o ano en que recuperamos a LIBERDADE!

Dende o IES de Porto do Son para o 2021!!!

https://issuu.com/home/published/selecci_n_carta_ao_2021__1_