Adeus á tempada

Rematou o curso, e con el, rematou a tempada do club de lectura de adultos. Foi un ano complicado, con xuntanzas co número reducido de asistentes, xuntanzas telemáticas,…e moita precaución! E pouquiño a pouquiño, levámolo adiante entre todas e todos.

De despedida, fixemos unha xuntanza diferente, ao aire libre. O xantar permitiunos falar do libro, O bosque das antas de Francisco X. Fernández Naval, e a ruta entre Seráns e Corrubedo, permitiu coñecernos mellor e desfrutar da fermosa costa do Porto do Son.

Igrexa de San Benito de Seráns
Praia de Seráns
Faro de Corrubedo

Agora toca descansar e aproveitar o tempo de vacacións para coñecer novas lecturas e cando chegue setembro, compartilas.

Cómics para un verán “sen máscara”!

Hoxe comeza o verán! Abéirase esperanzador aínda que hoxe vaia un frío propio do mes de marzo. E veñen tempos de recuperar a vida, de folgar coa familia e as amizades, de pasear, de deixar que a caloriña, que ha vir, nos vaia acariñando. É o tempo de levar un libro na mochila, na bolsa da praia, de telo aí, ao carón da hamaca ou do sofá. Á sombra do parasol ou da figueira da horta.

Xa sabedes que nos entusiasma o cómic! Así que, desta volta, as nosas recomendacións para o verán son algunhas das adquisicións deste curso de banda deseñada. Premede nos enlaces para ler recencións sobre cada unha delas.

Pechamos a guía cunha narración gráfica, ou álbum ilustrado, que nos encanta sobre as LIBRARÍAS!

Mais, xa sabedes que podedes levar para o verán ata tres libros da biblio. E se aínda non vos sentides seguros para viaxar, unha boa forma é facelo a través da lectura!

Bo verán! Apañade unha boa presada de enerxía!

De Isaac Díaz Pardo, Castelao e Rosalía ao cómic!

Tanto Castelao como Isaac Díaz Pardo foron pintores e escritores. Os dous crían na necesidade de unir a imaxe e a palabra. Castelao fíxoo nos seus álbums (Nós, Milicianos, Galicia Mártir, etc.), na narrativa e no teatro

“— Non quero ir porque o escolante pégame e a escola cheira que fede”. Castelao. Álbum Nós, 1931. Primeira edición. 


Isaac Díaz Pardo fíxoo nos carteis de cego que publicou en 1970: Paco Pixiñas, O marqués de Sargadelos e A nave espacial. En 1985 adicou un á vida de Castelao.

Seguindo os seus pasos pedimos ao alumnado de 1º, 2º e 3º de ESO que crease cómics a partir dos relatos de Castelao de Retrincos e Cousas en 1º e 2º de ESO e dos poemas de Rosalía de Cantares Gallegos. Mirade nesta selección que ben o fixeron!!! Tan ben que os mellores recibirán do EDNL e da Biblioteca un cómic en galego como galardón. E os premiados foron:

1º ESO

1º A: Fabián Santos Cambón, “O segredo” e Érika Maneiro Santamaría, “Peito de lobo”. 1º C: Adrián González Queiruga, “Sabela”.

2º ESO

2º A: Águeda Dios Rego, ” A cova dos carcamáns”.

3º ESO

3º A: María Sanlés Suárez, “Nasín cando as prantas nasen” e 3º D: Nerea González Couza “Pasa, río, pasa, río”.

PARABÉNS!!!!!

La neblina del ayer

Despois de tantos meses, por fin nos puidemos reunir presencialmente na xuntanza do club de lectura de adultos, e desde logo, cumprindo co número máximo de persoas permitidas, e con todas as medidas de seguridade.

E como ler é a maior parte das veces viaxar, ata a Cuba de principio do século XXI nos fomos co libro La neblina del ayer, de Leonardo Padura. Este libro constitúe o sexto capítulo dunha serie coa mesma personaxe principal, Mario Conde, expolicía na cidade da Habana. O libro ten certos tintes de novela negra, levándonos aos barrios máis perigosos da cidade, onde existe un submundo que ao propio protagonista lle asombra a súa existencia.

A realidade cubana da “gran crise” aparece con toda a súa crudeza. E entre tanta penuria, viaxase ao pasado con certa nostalxia para revivir o explendor da Cuba dos anos 50, da súa vida nocturna, dos boleiros,…

Retornamos a Galicia na última lectura deste curso con Francisco X. Fernández Naval e O bosque das antas.

Libros pendurados para o Día do Libro

Coa Covid os libros non se poden expoñer nos corredores do centro. Non é posible pasalos de man en man; non cabe sentar a carón e lelos ben aconchegados… Este virus veu marcar unha liña invisible de distancia que ten do outro lado a nosa saúde. A saúde do alumnado.

Así pois… como facelos visibles sen que sexa a través do blog ou as redes? Como interpoñelos nas miradas?

Enriba. Aí, si. Pendurados do teito. Libres de seren manipulados con risco, mais convidadores…

Acompañan o fermoso cartel do Día do Libro 2021 que nos enviaron do Ministerio de Cultura e Deporte!

Coas mans nos xeonllos, coa ilustradora Sonia Pulido, achegámonos. Levadas da man dos versos de Francisco Brines, “ulimos un xazmín na infancia unha tarde e non existiu a tarde”.

Vinde ás bibliotecas. Atoparedes un libro que faga que as horas deixen de existir.

Cabalos e lobos

Unha bonita narrativa, rica en metáforas, compón o libro do xornalista vigués Fran P. Lorenzo Cabalos e Lobos, quinto libro deste curso no club de lectura de adultos.

Esta novela segue a vida do matrimonio alemá formado por Albert e Úrsula Beckmann, de como os seus negocios os levan a establecerse nun vibrante Vigo da primeira metade do século XX, dos seus descendentes e dunha historia que permanece oculta ata o final.

A homosexualidade ocultada, reprimida e perseguida durante a dictadura de Franco aparece moi ben descrita na novela. Tamén o nazismo do matrimonio Beckmann. Precisamente, relacionado coa Segunda Guerra Mundial, é interesante a mención ás trümmerfrauen, as “mulleres das ruínas”, mulleres que bloque a bloque, intentaban reconstruír a súa vida.

A tía Mame

Poucas veces no que levamos de club de lectura, un libro creou tal polarización. Por un lado, estamos os que amamos á adorable tía Mame, chea de extravagancias, e polo outro, están os que a atoparon esaxerada, frívola.

A tía Mame aparece na novela homónima de Patrick Dennis, pseudónimo do escritor Edward Everett Tanner III no ano 1955. Nela relátase a vida dun orfo que vai vivir cunha tía que non coñecía. E así, deste xeito, o seu mundo vólvese cheo de cores, de aventuras, de humor,… Máis dun non puido evitar rir en alto mentres lía as súas páxinas. Semella o equivalente en novela da comedia clásica norteamericana.

O coronavirus levounos a facer a xuntanza mediante videoconferencia. Nunca suplirá ás xuntanzas fronte á fronte, pero polo menos serviu para reunir a gran parte dos membros do club de lectura.

Voltamos a unha novela en galego para o proximo mes, Cabalos e lobos, de Fran P. Lourenzo.

A elegancia do ourizo

Están os tempos complicados para facer unha xuntanza do club de lectura “Fraga de novio”. Só catro persoas (máximo permitido) participaron da última xuntanza. E despois A elegancia do ourizo.

Esta novela da francesa Muriel Barbery comeza presentándonos a unha persoaxe que oculta a súa intelixencia baixo un disfraz de porteira anodina. O seu traballo nun edificio de parisinos burgueses permítelle pasar desapercibida mentres desfruta coa literatura e a filosofía. Nese edificio está a outra gran protagonista, Paloma, unha nena de case 12 anos, moi intelixente e coa intención de suicidarse. Os seus “pensamentos profundos” tamén nos falan de filosofía e da beleza do arte.

A novela resulta ás veces complexa na súa lectura descritiva, e non a todo o mundo lle causan simpatía as persoaxes, pero vai mellorando cara ao final cando os dous mundos entran en contacto.

Para febreiro quedamos para tomar un té coa “Tía Mame” de Patrick Dennis.

O club de lectura en tempos de pandemia

O club de lectura de adultos “Fraga de Novio” tivo a segunda xuntanza neste curso tan complicado coa intención de manter certa normalidade, se temos como normal as distancias sociais, o uso de máscaras ou as videoconversas con compañeiros.

En tempos de pandemia, o libro que lemos remitiunos a outra pandemia do século XX, a cal non aparece nos medios pero aí segue matando persoas por todo o mundo, a pandemia do SIDA. O cómic Píldoras azules visualiza e normaliza ás persoas seropositivas, alonxando o medo ao descoñecido que todos tiñamos nos primeiros anos nos que surxiu a enfermidade.

O cómic de Frederik Peeters ten uns trazos sinxelos pero cheos de simbolismos, mostrando sobre todo, unha fermosa historia de amor.

Colaborando pola lectura e o servizo público

Alá polo verán, recén rematado o confinamento, recibimos unha chamada da biblioteca municipal. Querían dar un servizo público aos centros e mercar exemplares dos libros que o alumnado podería precisar para o novo curso. Que mellor forma de optimizar os recursos! Promover a lectura e seguir tendendo pontes entre os axentes de lectura da comunidade! E aquí están, na biblioteca do Son, as nosas propostas de compra. Moitas grazas ao Concello e a Xosé Manuel, por termar desta colaboración e por contar connosco. Xa sabedes, non só están na biblio do centro, podedes pasar por alí para pedilos en empréstito. Só unha condición: facer o carné.