Setembro

Cando remata o verán, comeza o curso, e con el a nova tempada do club de lectura Fraga de novio. Neste mes de setembro adoitamos facer a primeira xuntanza, a de acollida, ben para reencontrarnos cos habituais compañeiros de lecturas ou ben, como foi nesta ocasión, para coñecer novas caras que nos van acompañar nesta tempada. Nesta primeira xuntanza fixemos un repasiño das lecturas de verán de cada un de nos, pois sempre se descubre algo interesante.

E para comezar, imos ler o libro de Tatiana Tîbuleac El verano que mi madre tuvo los ojos verdes, unha novela dura pero ao mesmo tempo adictiva.

Advertisement

Repasando a Ilíada con Kallifatides

Para rematar a tempada decidimos achegarnos á visión persoal que fai Theodor Kallifatides, o escritor grego afincado en Suecia, do clásico de Homero na súa obra El asedio de Troya, publicado por Galaxia Gutemberg. Unha novela ben acaída para estes tempos terribles de guerra. Unha profesora, durante a II Guerra Mundial na Grecia invadida polos nazis, cóntalles aos seus alumnos, dentro dunha cova que lles serve de refuxio, outra guerra, a de Troia; unha guerra cruenta e sanguinaria entre os aqueos e os troianos, onde os dous pobos sofren os horrores da loita corpo a corpo, unha loita sen sentido que se repite agora no contexto onde viven a docente e os seus alumnos. Na guerra do século XX os invasores, despois dunha longa convivencia co pobo oprimido, acaban por resultarlles familiares e parecen desdibuxarse os odios, xa non se sabe quen é o inimigo; simplemente son homes e mulleres nunha situación extrema, de sufrimento. Na versión da Ilíada que nos ofrece Kallifatides os deuses non interveñen apenas, e son os homes e mulleres os responsables dos feitos. Hai un afondamento na psicoloxía dos heroes que, ao final, amosan o que son, homes, ás veces compasivos e outras irancundos. Unha reflexión sobre a insensatez da guerra e sobre a psicoloxía humana.

Nesta última reunión xuntámonos pouquiñas, porque o final de curso sempre nos pilla apuradas; pero contamos coa presenza de Luisa, que o ano que vén participará neste club de Lerpeir@s. Benvida!!

Un pouco de filosofía

Última tarde do club de lectura Fraga de Novio. Para rematar con bo sabor de boca, despois de xantar, desprazámonos ata Rianxo para conversar e pasear con Xosé Ricardo Losada, autor do último libro da tempada, A casa xunto ao volcán, libro co cal obtivo o premio Viaducto de Novela no ano 2019.

Que interesante é poder conversar co autor da novela lida pois proporciona puntos de vista imperceptibles despois dunha primeira lectura. O autor, profesor de filosofía, ensinounos a Nietzsche en cada capítulo da súa novela. E xa que estabamos en Rianxo, aproveitamos para facer unha visita á casa-museo de Manuel Antonio, persoaxe da súa novela O rosario e a buguina.

Voltaremos en setembro con ganas de ler e desfrutar en boa compañía.

Palabras para contar as nosas emocións

Imos pechar un curso no que as emocións andaron polos corredores, nas clases, nos cadernos… prenderon no patio, no xardín…; coáronse nos libros e volveron saír das súas páxinas buscando acubillo na biblioteca ata que as fomos buscar ; fixéronse voz e imaxe; arremuiñáronse no taller e no espazo maker ata angularse nunha cúpula xeodésica… Porque son iso, palabras, a base da nosa capacidade de sentir e de contar o que sentimos.

Aí van, en galego, castelán, inglés e francés, traballadas dende o Tratamento Integrado de Linguas nestas materias en varios niveis da ESO.

Si, porque as linguas van da man e non saben de fronteiras. Como o sentir.

Agora só as tes que empregar para expresar as túas emocións en contos, nun poema, nun artigo, nun debate… alto e forte ou baixxiiññooo, a carón da orella. :):)

Rematamos a tempada

En plena ola de calor tivemos a última xuntanza do club de lectura dos Benxamíns. El beso Nº8, da escritora Colleen AF Venable e da ilustradora Ellen T. Crenshaw puxo un punto e seguido ás andanzas deste club de xente miúda. O cómic, a priori de lectura fácil, agocha unha temática relacionada coa transexualidade e homosexualidade, e como esta se vive en diferentes épocas.

Pero non todo foi lecturas. Tamén aproveitamos as cartas do Digit para contar como foi a nosa experiencia neste curso no club de lectura. Nen que decir ten que tamén botamos unha partidiña.

Agora toca descansar e desde logo, seguir lendo nestas vacacións de verán.

Muller e ciencia: dende o IES ao Concello

A partir da celebración do 8M no instituto, na que contamos coa presencia de María Mayán, a área de Benestar do Concello de Porto do Son ofreceunos organizar unha xornada sobre igualdade relacionada coa ciencia e o papel da muller neste campo ao longo da historia. O alumnado de cultura científica púxose mans á obra e hoxe puidemos desfrutar do resultado: charla e o posterior coloquio de tres investigadoras.

Participaron Andrea Muras, microbióloga que estuda as relacións entre as bacterias; Socorro Castro, química, profesora da Universidade da Coruña e experta en deseño de novos materiais e as súas aplicacións; e María Mayán, investigadora líder en proxectos internacionais sobre enfermidades dexenerativas e cancro.


Foi un pracer telas con nós e coñecer as súas investigacións, así como as dificultades que atopan no seu día a día só polo feito de ser muller. Foi especialmente interesante o coloquio final onde responderon francamente ás preguntas do alumnado, algunhas delas moi persoais e onde deixaron constancia da necesidade de que tanto homes como mulleres loitemos pola igualdade en todos os ámbitos da vida.

Aquí vos deixamos unha preciosa imaxe dos organizadores e participantes co Monte Louro e o mar de Porto do Son:

As nosas ilustradoras

A ilustración científica sae das aulas da man do alumnado de 1º de bacharelato. Leva tempo abraiando aos que pasan polo corredor do 1º andar e os que se achegan a biblio.

Parecen sacados dos álbumes ilustrados que expuxemos co gallo do 8 de marzo, pero son obras de rapazas e rapaces de 16 e 17 anos realizadas na materia de Bioloxía e amosan un dominio da cor e do trazado que non deixa indiferente ao que se para a mirar. Aquí vemos a unha mosca despistada que se quixo pousar no fieito de Ruth Monteagudo:

Mellor que describir con palabras é dar paso as imaxes, que falan por si soas:

Tamén fixeron ilustracións de anatomía:

Menuda canteira de artistas! As nosas felicitacións para todas elas e eles.

E agromaron centos de flores!

E xa, rematando maio, o corredor encheuse de flores e de mensaxes: “Flores no canto de balas”. Así queremos facer visible e facer noso o berro que mulleres feministas rusas publicaron o 8 de marzo en redes de resistencia contra a guerra: цветы вместо пуль, flores no canto de balas contra a guerra. 

A torre de Babel segue en pé: distintas linguas pero un mesmo sentir contra a barbarie e a violencia. Unha chamada á esperanza a través da beleza das flores, que agromaron polas paredes, a carón da do Principiño, frente á dor e a destrución.

Concienciar na necesidade da paz e tamén promover o espíritu crítico é o que nos propoñemos dende a biblioteca e as titorías. O alumnado de ESO de Porto do Son deu renda solta á vertente creativa tentando mitigar a escuridade que provocan as novas que escoitamos día a día a través dos medios de comunicación.

Nun principio

Nun principio… Esta frase aparece de xeito reiterado no libro de Nell Leyshon El color de la leche, un gran libro de poucas páxinas que vai poñendo final á tempada do club de lectura de adultos. Suceden as cousas ao azar ou estamos destinados? Sexa cal sexa a resposta, moitas veces coñecendo o principio, adiviñamos o final.

Unha nena pobre e analfabeta, que consegue transmitir ao lector o poder da escritura e da lectura, o poder da comunicación. Unha nena que consegue aprender a escribir e conta ao lector a súa historia, para que a entendamos, de xeito sinxelo e directo. Altamente recomendable!

O principiño…, unha flor, unha torre de Babel

Que valor pode ter o nacemento dunha flor como esperanza de paz no mundo que estamos vivindo?

Saint de Exúpery deunos as palabras no comezo do capítulo VIII de O principiño. Nunha singular torre de Babel que encheu a nosa biblioteca na conmemoración do Día do Libro, léronnolas Aya, Uxía, Mauro, Robert, Ainhoa, Raquel, María, Leyao e Susana (colaboración no grego). Dende Soncine, Manela, Celia, Álex e David apórtannos a súa mirada na gravación e a montaxe do vídeo.

Si, o nacemento dunha flor pode traer a esperanza…