A Esmorga

Cando se plantexa un libro para compartir no club de lectura sempre se pensa en algo publicado recentemente, nunha novidade. Pero está moi ben “redescubrir” clásicos, voltar a ler libros lidos fai moitos anos, e que case todo o mundo ten na súa biblioteca. Desta volta lemos no club de adultos A esmorga, de Eduardo Blanco Amor, un dos clásicos da literatura galega. Unha novela que asemella unha traxedia grega, onde ves como chega o mal inevitable.

Agora toca ver en vivo os lugares que percorren o Cibrán, o Bocas e o Milhomes, pois varios membros do club faremos unha ruta literaria para coñecer Auria.

Excelencia académica!

Acabamos de recibir a grata noticia do recoñecemento de Excelencia académica que lle otorgou a Xunta de Galicia ao noso exalumno Suso Vázquez Pajares, agora brillante estudante de Xeografia Historia na USC.

Non hai moito que participaba nas sesións dos clubes de lectura e nos certames literarios, nos que xa apuntaba maneiras, gañando en diversas ocasións.

Esta imaxe ten o atributo alt baleiro; o se nome de arquivo é resistencia-investigando-4.jpg — dav

Dende a Biblio do Ies de Porto do Son, moitísimos parabéns!!

Atranco no banco

Para celebrar o Día Mundial da Radio eleximos como lectura do club de lectura Furalibros a obra de teatro de Manuel Núñez Singala Atranco no banco. Esta obra curta é divertidísima, sobre todo cando a teatralizamos. Que difícil é buscar o tono axeitado! Despois da teoría subimos á radio escolar para poñer en práctica e gravar algún fragmento. Aínda hai moito que aprender, pero o primeiro paso xa está dado.

14 de febreiro: Amor a primeira vista

Cres no amor a primeira vista? Cos libros tamén pode xurdir o frechazo: unha ollada, unha chiscadela, un ruxe ruxe no estómago… Si quero! Quero deixarme levar polas verbas e ver se me namora de verdade.

Ven ao noso “First dates” e atopa o teu libro soñado. Quen sabe se está aquí a agardar por ti?

Casa de bonecas

O día Mundial da Radio coincidiu desta volta coa sesión do club de lectura. Escollemos para esta efemérides tan especial a lectura do clásico teatral Casa de bonecas, do noruegués Henrik Ibsen, coa intención de preparar unha lectura dramatizada e subila ao noso blog Onda Perseveira.

Esta peza constitui un antes e un despois na historia do xénero dramático, pois a protagonista preséntase como unha heroína literaria pouco convencional, unha heroína con luces pero con moitas sombras que imos coñecendo segundo vai transcurrindo a obra. Despois de darse conta de que a historia que está vivindo co seu home é unha farsa, toma unha drástica decisión que romperá os esquemas da sociedade do SXIX na que foi escrita. A resolución de Nora de comezar a vivir coma un ser individual ten un prezo moi elevado, pois vese abocada á máis completa soidade.

Novela de xadrez

23 de xaneiro de 2023

@s Lerpeir@s adicamos esta sesión do club de lectura a falar desta obra maestra, Novela de xadrez, que pon enriba da mesa este xogo “único entre os xogos”.

O seu autor, Stefan Zweig, enfrenta a dúas figuras antagónicas, Czentovic, o campión mundial de xadrez, e o Dr. B., un enigmático home que a Gestapo fai prisioneiro cando Hitler invade Austria. Dous personaxes antagónicos, coma os cadros brancos e negros, que representan o mundo do nazismo, da brutalidade enfrentado ós valores da Europa de entreguerras.

O xadrez amósase coma unha vía de escape, de resistencia contra o sufrimento do aillamento, pero que se convertirá nunha arma de dobre fío xa que producirá unha visión distorsionada da realidade.

Esta obra reflicte o sufrimento psicolóxico que marcou gran parte da vida do escritor e dos seus últimos días, antes do seu suicidio. Exiliado forzoso polo nazismo, nunca voltará á súa Austria natal, recolle nesta novela breve a cuestión de como sobrevivir á nosa propia mente.

Aínda que as compoñentes do club das Lerpeir@s nos vai máis a lectura, este xogo ten engaiolada a moita rapazada do noso ies. Velaquí tedes a mostra das partidas rápidas que teñen lugar nos recreos na nosa biblio:

Laxeiro: un xeito de ollar

Laxeiro, o pseudónimo co que sempre asinou as súas obras José Otero Abeledo, foi a figura homenaxeada no ano 2022 no Día das Artes Galegas pola Real Academia Galega de Belas Artes.

É unha das figuras máis representativas do Movemento Renovador da pintura galega. Emigrado, vangardista e orixinal espandeu a cultura rural e tradicional galega a través das súas obras pictóricas.

Fixemos unha selección dalgunhas das súas producións que podes ver na exposición que colocamos nas cortizas que hai nos corredores próximos á biblioteca e tamén no noso blog ‘etikeles’. Inspirándote nelas o Equipo de Dinamización da Lingua Galega (EDLG) e o de Biblioteca propoñémosche que escribas un microrrelato. Para iso deberás escoller un dos seus cadros e expresar aquilo que che suxira dun xeito literario.

Recordámoste que no blog tes consellos para escribir un microrrelato e podes ler algunha mostra: https://etikeles.wordpress.com/2016/04/12/microrrelatos-sorprendendo-o-lector/

BASES

Os microrrelatos deben presentarse en galego, independentemente de que conten para a materia de castelán ou de galego.
Cada persoa só poderá entregar un.
Has de inspirarte nun dos cadros de Laxeiro (incluídos os gravados). Escólleos entre os que figuran na exposición (nela tes un libro sobre Laxeiro como pintor que podes consultar) e no documento que aparece na entrada do blog e da AV. Copia a imaxe no documento que entregues ilustrando a túa creación. Inclúe un pé de foto co título.
Os textos deben ser orixinais.
Publicaranse no blog da biblioteca os gañadores e unha selección dos presentados.
O xurado resérvase o dereito de deixar deserta algunha das categorías se os textos carecesen de calidade.
Os traballos entregaranse á profesora responsable a través da Aula Virtual en formato pdf cun pseudónimo e contarán para nota para a 2ª avaliación desa materia (Lingua Galega ou Lingua Castelá).
O prazo límite de entrega será o venres 3 de marzo de 2023 e fallarase o premio o día venres 31 de marzo de 2023 no primeiro recreo.
A entrega de premios terá lugar na biblioteca no 2º recreo do día 31 de marzo.

CATEGORÍAS

A: 1º e 2º de ESO
B: 3º e 4º de ESO
C: 1º e 2º de BACHARELATO e ciclo.

PREMIOS POR CATEGORÍAS

En cada categoría haberá dous premiados. O premio será…

laxeiro-un-xeito-de-ollar-1-1 Descarga\t

Lúa do Senegal

O alumnado do club de lectura Os Furalibros tivo outro golpe de realidade a partir dun libro. Nesta ocasión voltamos a África da man de Agustín Fernández Paz e a súa obra Lúa do Senegal. Nesta novela pequerrechiña, moi fácil de ler, seguimos as aventuras e desventuras dunha nena senegalesa que chega a Vigo coa súa nai e irmá para reunirse co pai. Historias da emigración, do desarraigo, da soidade e de aceptación.

Casualidades que ten a vida, contamos desde fai dous meses no instituto cunha nena que chegou de Senegal polo que nos imaxinamos que estará pasando por situacións similares ás da protagonista da novela. Khary acompañounos na xuntanza e ensinounos pinceladas do seu país: gastronomía, música, paisaxes, historia,… Moito aprendemos!

Botanicum

La memoria secreta de las hojas, da botánica americana Hope Jahren, foi o centro da última xuntanza do club de lectura de adultos. Un libro que contén á súa vez, tres libros: unha autobiografía, un ensaio científico e un tratado de botánica. Hope Jahren enlaza a súa traxectoria vital e persoal ao desenvolvemento das propias plantas, mostrándonos que son seres vivos moi especiais, non tan notorios como os animais, pero con estratexias interesantes para poder sobrevivir, contribuíndo ademáis, á supervivencia da nosa propia especie. Ademáis, este é un libro onde se pon de manifesto a realidade do traballo dos científicos, e as dificultades dunha muller científica para facerse camiño.

Captain Fantastic

Para despedir o trimestre reunimos aos dous clubs de lectura, Lerpeir@s e Furalibros (cambiamos de nome!) para compartir neste caso, o visionado dunha película para despois comentala. Para tal ocasión, eliximos Captain Fantastic, do director Matt Ross e protagonizada por Viggo Mortensen. Podemos afirmar con rotundidade que nesta historia todos nos rimos e nos emocionamos, e aprendemos a ver a educación doutro xeito, lonxe de convencionalismos. Ningún de nos se puido imaxinar levar un estilo de vida como a representada na película, unha vida sostible, lonxe da tecnoloxía e en harmonía coa Natureza. Ligamos este amor pola natureza cos libros que lemos os dous clubs: La chica alce de Malin Klingenberg e algún dos cómics de Leo. Voltaremos despois das vacacións de Nadal cun pouco de teatro.