Lúa do Senegal

O alumnado do club de lectura Os Furalibros tivo outro golpe de realidade a partir dun libro. Nesta ocasión voltamos a África da man de Agustín Fernández Paz e a súa obra Lúa do Senegal. Nesta novela pequerrechiña, moi fácil de ler, seguimos as aventuras e desventuras dunha nena senegalesa que chega a Vigo coa súa nai e irmá para reunirse co pai. Historias da emigración, do desarraigo, da soidade e de aceptación.

Casualidades que ten a vida, contamos desde fai dous meses no instituto cunha nena que chegou de Senegal polo que nos imaxinamos que estará pasando por situacións similares ás da protagonista da novela. Khary acompañounos na xuntanza e ensinounos pinceladas do seu país: gastronomía, música, paisaxes, historia,… Moito aprendemos!

Advertisement

Botanicum

La memoria secreta de las hojas, da botánica americana Hope Jahren, foi o centro da última xuntanza do club de lectura de adultos. Un libro que contén á súa vez, tres libros: unha autobiografía, un ensaio científico e un tratado de botánica. Hope Jahren enlaza a súa traxectoria vital e persoal ao desenvolvemento das propias plantas, mostrándonos que son seres vivos moi especiais, non tan notorios como os animais, pero con estratexias interesantes para poder sobrevivir, contribuíndo ademáis, á supervivencia da nosa propia especie. Ademáis, este é un libro onde se pon de manifesto a realidade do traballo dos científicos, e as dificultades dunha muller científica para facerse camiño.

Captain Fantastic

Para despedir o trimestre reunimos aos dous clubs de lectura, Lerpeir@s e Furalibros (cambiamos de nome!) para compartir neste caso, o visionado dunha película para despois comentala. Para tal ocasión, eliximos Captain Fantastic, do director Matt Ross e protagonizada por Viggo Mortensen. Podemos afirmar con rotundidade que nesta historia todos nos rimos e nos emocionamos, e aprendemos a ver a educación doutro xeito, lonxe de convencionalismos. Ningún de nos se puido imaxinar levar un estilo de vida como a representada na película, unha vida sostible, lonxe da tecnoloxía e en harmonía coa Natureza. Ligamos este amor pola natureza cos libros que lemos os dous clubs: La chica alce de Malin Klingenberg e algún dos cómics de Leo. Voltaremos despois das vacacións de Nadal cun pouco de teatro.

Desde os clubs de lectura do IES de Porto do Son, felices festas e que o vindeiro ano veña cargadiño de felicidade e boas lecturas.

Historias da emigración

Cando un escritor nos acompaña no club de lectura, sempre resulta do máis enriquecedor. Onte tivemos a sorte de contar con Xesús Fraga á hora de xantar e posterior sobremesa, xantar ao redor da súa novela Virtudes (e misterios). Lendo este libro, nalgún momento todos nos vimos reflexados, pois apenas hai galega ou galego que non teña unha historia da emigración na súa familia. Xesús expón ante o público a súa propia historia familiar, escrita dun xeito fermosísimo, tanto que lle valeu o Premio Nacional de Narrativa no 2021. Ademáis de emigración, as horas deron para charlar da situación do libro en galego, da propia língua, da precariedade laboral,… Un pracer moi recomendable!

Os dereitos das nenas e dos nenos

O pasado luns 20 de novembro conmemoramos na Biblioteca o Día Internacional dos Dereitos da Infancia. Así que mostramos nunha pequena exposición a diferenza que existe entre os nosos nenos e os nenos dos países non desenvolvidos en canto ao cumplimento destos dereitos. Observar outra realidade pon de manifesto a sorte que temos. Esta exposición acompañouse cunhas cantas lecturas que nos axudan a coñecer mellor outras vidas moi diferentes, pero igualmente con nenos protagonistas, como o noso alumnado.

Outras realidades

A primeira inmersión do club de lectura Benxamíns tivo lugar nun cómic baseado na historia real de Omar Mohamed e o seu irmán Hassan, nenos refuxiados da guerra en Somalia. A súa historia vital móstranos unha realidade que nos queda moi lonxana, pero non por iso deixa de impactar. O cómic, ilustrado pola estadounidense Victoria Jamieson, describe perfectamente e cun trazo simple, a vida nos campos de refuxiados no medio do deserto de Kenia, a falta de alimento e auga, a falta da familia…e sobre todo, a importancia da escola e as ganas de poder acudir todos os días a un lugar onde aprender. Nunca o cole estivo tan ben valorado!

A máis medo, máis diversión

Respiración acelerada, aumento dos latexos do corazón, todos os órganos dos sentidos en alerta,… o feito de pasar medo, fai que o noso corpo se prepare para o perigo. Entón, por que nos gusta pasar medo? O ben que o pasamos no Samaín parece estar relacionado coa liberación dunha substancia química que producimos de xeito natural, a dopamina, a cal, tamén está relacionada con fenómenos placenteiros como o namoramento.

Esta explicación biolóxica complementa ao traballo de preparar a nosa Biblioteca para o Samaín, para pasar medo vendo curtas de terror ou escoitando relatos de medo. Se as sensacións que tiveron os rapaces nos recreos foron como o namoramento, quedamos satisfeitas.

Un verán de ollos verdes

Poucas novelas teñen un comezo tan impactante como o libro da escritora moldava Tatiana Tîbuleac El verano en que mi madre tuvo los ojos verdes. Un comezo brutal, cheo de odio e agresividade por parte dun adolescente cara a vida que lle tocou vivir e especialmente cara súa nai, unha nai descrita dun xeito horrendo, pero cuns fermosos ollos verdes. Escrita de xeito cruda, esta novela móstranos a dureza das enfermidades mentais, concretamente unha de dezaseis letras. Non se pode afirmar que remate ben, cada lector ten a súa propia versión, pero a sensación ao final da lectura é de tranquilidade. Lectura recomendada no alto da lista!

A rodar de novo

Voltamos con ímpetu renovado nesta nova tempada dos clubs de lectura do alumnado do centro. Como outros anos, esta primeira xuntanza foi compartida polos dous clubs, o dos Benxamíns e o d@s Lerpeir@s. A experiencia das maiores mestura ben coa hiperactividade dos pequenos, sobre todo daqueles que están por primeira vez nun club de lectura. Explicar o funcionamento básico do club e facer as pertinentes presentacións, levounos máis dunha hora. E todo iso acompañado por manxares para adozar.

Quedounos un tempiño para facer unha actividade moi creativa. Por grupos elexiron libros da biblioteca polo seu título, e a partir disto elaboraron poemas. Foi abraiante comprobar o enxeño destos rapaces e rapazas. Prometen!

Repasando a Ilíada con Kallifatides

Para rematar a tempada decidimos achegarnos á visión persoal que fai Theodor Kallifatides, o escritor grego afincado en Suecia, do clásico de Homero na súa obra El asedio de Troya, publicado por Galaxia Gutemberg. Unha novela ben acaída para estes tempos terribles de guerra. Unha profesora, durante a II Guerra Mundial na Grecia invadida polos nazis, cóntalles aos seus alumnos, dentro dunha cova que lles serve de refuxio, outra guerra, a de Troia; unha guerra cruenta e sanguinaria entre os aqueos e os troianos, onde os dous pobos sofren os horrores da loita corpo a corpo, unha loita sen sentido que se repite agora no contexto onde viven a docente e os seus alumnos. Na guerra do século XX os invasores, despois dunha longa convivencia co pobo oprimido, acaban por resultarlles familiares e parecen desdibuxarse os odios, xa non se sabe quen é o inimigo; simplemente son homes e mulleres nunha situación extrema, de sufrimento. Na versión da Ilíada que nos ofrece Kallifatides os deuses non interveñen apenas, e son os homes e mulleres os responsables dos feitos. Hai un afondamento na psicoloxía dos heroes que, ao final, amosan o que son, homes, ás veces compasivos e outras irancundos. Unha reflexión sobre a insensatez da guerra e sobre a psicoloxía humana.

Nesta última reunión xuntámonos pouquiñas, porque o final de curso sempre nos pilla apuradas; pero contamos coa presenza de Luisa, que o ano que vén participará neste club de Lerpeir@s. Benvida!!