Unha viaxe ao país sen fronteiras

Onte á tarde estivemos de viaxe por un país que pode que saibamos situar nun mapa, pero do cal coñecemos basicamente a súa capital por unha famosa carreira. Estoume referindo ao Senegal.

Foi a última xuntanza do club de lectura de adultos do IES do Porto do Son deste curso e compartímola con algúns membros do club de lectura irmandado, o do IES da Pobra do Caramiñal. Mais non só cos nosos compañeiros lectores compartimos lectura e merenda, senón tamén con dous dos escritores máis recoñecidos do Barbanza, por non dicir Galicia: Antón Riveiro Coello e Xerardo Agrafoxo, autor do libro “O país sen fronteiras”, lido por ambos clubes.

A xuntanza foi deliciosa, e non o digo só polos doces que trouxeron Lola, Carme, Cris e M.Xesús! Da man de Xerardo Agrafoxo, soubemos da vida, xente, clima, da historia… do Senegal!

Son tempos de facer memorias e balances, e despois de onte e todas as xuntanzas que tivemos neste curso, non podemos dicir máis que hai moitas ganas de continuar con este proxecto de compartir lecturas.


Xantar con Héctor Cajaraville e “De remate”

O mércores pasado había temporal. Así que no club de lectura Fraga de Novio agradecemos moitísimo que Héctor Cajaraville se achegase para xantar con nós e falarnos da novela pola que recibira no 2015 o Premio Xerais de Novela.  E veu con enerxía, e contounos do proceso de escritura deste libro ben singular e que nos fixo disfrutar. Pouco común na súa escrita, maridaxe entre xornalismo, diario, xénero epistolar e correo electrónico, ata con entrevistas e poemas,  textos diversos para recoller a historia de Bieito Sanmarful. As súas columnas no xornal Loaira conforman un retrato de Galicia que nos fai sorrir, e mesmo rirnos de nós mesmos. E tamén pensar na sociedade, no paso do tempo, na paisaxe… e, cunha querencia case filolóxica pola palabra, na lingua! É unha obra que sorprende gratamente o lector, cunha prosa áxil, amena. Como el se mostrou entre prato e prato.

Foi un encontro moi agradable e un pracer compartir con el mesa, mantel e novela!

A próxima obra tamén promete, Todo canto fomos de Xosé Monteagudo! Vémonos xa no 2019!

Club de lectura “Fraga de Novio”

Comezamos o curso inaugurando un novo clube de lectura no IES do Porto do Son, pero desta volta de adultos: profes, nais e pais, persoal non docente…. e que mellor nome que poñernos que Club de Lectura “Fraga de Novio”IMG-20171025-WA0005O primeiro libro que compartimos foi un clásico, Matar un ruiseñor, de Harper Lee. E que mellor xeito de charlar sobre o libro que reunirnos á hora de xantar… Despois de comentar varios aspectos da obra e cando todos estabamos dacordo na súa calidade, saíu un comentario discordante, o cal se agradece, pois ademais de darnos outro punto de vista da obra, dálle vida a estas xuntanzas. Grazas Antón!

Un mes despois, tivo lugar a segunda quedada, desta vez con Miguel-Anxo Murado e Outra idea de Galicia. Podo afirmar que todos desfrutamos moito co libro e sobre todo, aprendemos moitísimo. E como o seu autor, tivemos a sorte, grazas a Sonia, de desfrutar do mapa de Galicia de Domingo Fontán:

IMG_20171129_162303

 

IMG-20171129-WA0004

Pero non todo vai ser ler! Hai moitas actividades que compartir como ir ao cine e ver A librería de Isabel Coixet, que tamén deu pé a uns cantos comentarios.

IMG-20171122-WA0008


Agora, xa para o vindeiro ano, en xaneiro, agárdanos Patria, de Fernando Aramburu. E sen ningunha dúbida, desfrutaremos moito da lectura e mais da xuntanza.