A biblioteca: sinerxía na Escola que queremos

Sinerxía

substantivo feminino

2. Farmacia Fenómeno polo que se combinan as accións de dúas ou máis substancias para obter un efecto maior ca a suma dos efectos individuais de cada unha delas.

Con esta definición abriamos Rut e eu, Sonia, como representates da biblioteca do IES de Porto do Son, a charla sobre os proxectos interdisciplinarios no noso centro coa que participamos o 7 de outubro nos Encontros CAFI de Bibliotecas Escolares sobre (AM) Alfabetizacións Múltiples e ABP (Aprendizaxe baseado en proxectos). Proxectos nos que o equipo de biblioteca vén colaborando ou que vén impulsando, e, sempre, enriquecendo. Porque sabemos que o ensino é iso, a combinación de accións e sentires para obter un efecto maior cá suma de accións e efectos individuais. Sumar, aprender e avanzar cara a ESCOLA QUE QUEREMOS!

Setembro

O ano novo comeza en xaneiro, pero para moitos, esa renovación, esa volta á rutina, é sen dúbida en setembro. Este é o mes onde comezamos a desperezarnos despois do verán e con máis ou menos ganas, comezamos a rodar. E nisas estamos no club de lectura de adultos Fraga de Novio. Viñemos con ganas, coa xente de sempre, coa xente que volve despois dun tempo e con xente nova. Para outubro, agardaranos o Verán sen homes de Siri Hustvedt.

Semella que esta tempada pode ser como as anteriores, as prepandémicas. Ler en grupo sempre é un pracer.

Adeus á tempada

Rematou o curso, e con el, rematou a tempada do club de lectura de adultos. Foi un ano complicado, con xuntanzas co número reducido de asistentes, xuntanzas telemáticas,…e moita precaución! E pouquiño a pouquiño, levámolo adiante entre todas e todos.

De despedida, fixemos unha xuntanza diferente, ao aire libre. O xantar permitiunos falar do libro, O bosque das antas de Francisco X. Fernández Naval, e a ruta entre Seráns e Corrubedo, permitiu coñecernos mellor e desfrutar da fermosa costa do Porto do Son.

Igrexa de San Benito de Seráns
Praia de Seráns
Faro de Corrubedo

Agora toca descansar e aproveitar o tempo de vacacións para coñecer novas lecturas e cando chegue setembro, compartilas.

Isaac Díaz Pardo na Memoria

En agosto do 2020 cumpríanse 100 anos do nacemento dunha das persoas máis luminosas do noso século XX: Isaac Díaz Pardo. Pintor, ilustrador, escritor, empresario… e, ante todo, xunto con Luís Seoane, creador dun soño: o Laboratorio de Formas, unha idea feita realidade na que a arte, a economía, a memoria e a identidade como piares dunha Galicia posible.

Dende o equipo de biblioteca promovemos o traballo sobre Isaac e o seu labor dende diferentes materias. Perseguiamos estes obxecivos:

  • Poñer en valor o labor desenvolvido por Isaac Díaz Pardo e Luís Seoane no Laboratorio de Formas e a fábrica de Sargadelos. 
  • Poñer en valor do labor desenvolvido polos personaxes históricos representados na cerámica de Sargadelos.
  • Procurar información e a súa reelaboración.
  • Traballar en equipo.
  • Valorar o traballo interdisciplinario nun proxecto común entre varias materias: Lingua Galega, Lingua Castelá, Educación Plástica e Visual e Matemáticas.
  • Corrixir a expresión lingüística escrita.
  • Reforzar a utilización dos correctores en liña na produción textual. 
  • Reforzar a utilización do Classroom e o Drive para o traballo individual e colaborativo.

Plástica

Traballos de creación de figuras a partir das liñas de deseño (formais e de contido identitario) das figuras de Sargadelos:

1º, 2º e 3º de ESO

Lingua Galega

O alumando de 1º a 3º de ESO coñeceu a figura de Isaac Díaz Pardo a través de formularios web:

https://docs.google.com/forms/d/1kCbtL-RO3lXQite6Re2EW38hoLtGTtG98omgourJows/edit

https://docs.google.com/forms/d/1O1AFKEwbbZobrHtPEcGJb_AnitUTrfwMZ665bMQeRig/edit

En 1º e 2º de ESO, tirando da relación entre Isaac Díaz Pardo e Castelao, o diálogo entre texto e imaxe, e os cantares de cego creados por Isaac, propuxemos ao alumnado que crease cómics a partir das lecturas de Retrincos, Cousas e Cantares Gallegos. Nesta imaxe recóllese un exemplo dunha das tarefas que se adxunta a continuación como pdf.

Nesta entrada recollemos a actividade e os premiados por parte do EDNL e o equipo de biblioteca.

En 3º de ESO investigaron sobre A nosa historia nas figuras de Sargadelos e cos seus traballos creamos unha presentación recompilando a información. Poñendo en valor a nosa identidade!

En 2º de Bacharelato, contextualizouse a nunha tarefa do bloque de sociolingüística, tras a lectura de Instrucións para tomar café, de Núñez Singala. Estes relatos convidan á reflexión sobre a identidade galega e o uso da lingua galega en diferentes ámbitos e funcións, entre eles o empresarial. A tarefa sobre Isaac Díaz Pardo, ademais do cuestionario para coñecer o intelectual e o seu labor, constituíu a segunda parte do traballo a partir da obra de Singala. Debían reflexionar sobre o tema: Como somos os galegos? Como queremos ser os galegos? Dividíase en dous bloques: Mirando atrás e Pensando o presente para construír o futuro. Que mellor exemplo que Isaac Díaz Pardo e o Laboratorio de formas!

Pedíuselles que creasen un texto sobre o intelectual a partir da investigación de diversas fontes e que analizasen o uso do galego e os criterios identitarios nunha selección de empresas galegas actuais.

Entre os textos realizados polo alumando, en xeral ben interesantes, seleccionamos estes das alumnas Clara Tomé Mariño e Valeria Baleirón Sobrido:

Lingua Castelá

Na materia de Lingua Castelá en 4º de ESO responderon tamén un formulario para coñecer a Isaac Díaz Pardo e contextualizar a tarefa que consistiu na creación dun microrrelato a partir da obra pictórica do artista e empresario.

Entre os microrrelatos presentados, seleccionamos os creados por Silvia Pego e Indira Fernández Rodal a partir dos cadros Os afogados e O discurso:

Matemáticas

Dende o departamento de Matemáticas traballaron a xeometría a partir do deseños da cerámica de Sargadelos:

Xela Arias. Letras Galegas 2021

Quen era? Como era? Que atopamos tras esta mirada?

Dende o equipo de biblioteca e o equipo de Dinamización da Lingua Galega convidámoste a coñecela. Esta é a nosa homenaxe.

Le, observa, repara…

Para lela en pantalla completa, activa a opción nos tres puntos da parte inferior.

E agora…, serás quen de atopar a resposta correcta? Abre ou descarga este díptico de actividades que poderás responder a partir da presentación:

Os debuxos de Antón no regreso de Os Resentidos

Os Resentidos volven aos escenarios. Fano co disco Organización Nautilus. E se o regreso da banda que fora pioneira no uso do galego nos 80 é xa de por si unha moi boa nova, para nós, para a comunidade educativa do IES de Porto do Son éo aínda máis. A razón non é outra que o ilustrador! Si, si, porque a persoa que creou os debuxos para nove dos temas deste disco que nos fala de piratas, tesouros…, que nos convida á festa (e, a reflexionar tamén, entre peza e peza) non é outro que o noso alumno Antón! O ilustrador de Portosín :):)

Xa sabemos da súa grande capacidade para o debuxo, para a cor! Un momentiño de descanso, un rotulador… e xa está: un pirata, un vilán, un polvo, un golfiño….

Dende o equipo de biblioteca felicitámolo polo seu traballo. E non é para menos, como podedes ver nun dos vídeos de promoción:

E aquí o temos o artista, a carón da banda na presentación do disco. Bravo, Antón!

Carta ao 2021. Un ano de pandemia

Esta semana cúmprese un ano do peche dos coles pola pandemia. A Covid-19 cambiou as nosas vidas: confinamentos, peches perimetrais, distancias, desinfección, apertas e bicos abeirados agardando poderen darse, medo… E tamén aprendizaxe, descubrir a importancia dos bos momentos, da liberdade do cotiá.

Dende o Departamento de Lingua Galega, o EDNL e a biblioteca, propuxemos en decembro ao alumnado escribir unha Carta ao 2021. Sumouse os curso de 1º, 2º, 3º de ESO e 1º de Bacharelato. De entre as cartas presentadas, seleccionamos dúas por nivel. A vida puxo atrancos no día a día das profes que o levamos e retrasamos a escolla. Cando o fixemos decidimos agardar ata esta semana para darlles ás alumnas e aos alumnos un pequeno galardón. Son Alexo Segade e Manuela Vázquez de 1º de ESO, Águeda Dios e Marta Cánive de 2º de ESO, Samuel Maneiro e Carlota León de 3º de ESO e María Rodríguez e Mariña Castelao de 1º de bacharelato. Parabéns!

Con estas cartas celebramos que resistimos, entre as correntes das fiestras abertas, as distancias nos corredores, as actividades en grupo anuladas, os protocolos estritos… PERO AÍ ESTAMOS, desexando que este 2021 sexa o ano en que recuperamos a LIBERDADE!

Dende o IES de Porto do Son para o 2021!!!

https://issuu.com/home/published/selecci_n_carta_ao_2021__1_

8 de marzo. Mulleres que esculcan horizontes

No 8 de marzo, Día da Muller Traballadora, no marco do tema interdisciplinario, os movementos migratorios. Cantas! Cantas historias detrás das tataravoas, bisavoas, avoas, tías, nais… Mulleres que esculcaron horizontes! Que procuraron un futuro en Venezuela, Arxentina, Inglaterra, Cuba, Estados Unidos, Uruguay, Suíza, Alemaña, Francia, Madrid, Barcelona, País Vasco…

Traballaron como camareiras, auxiliares de clínicas, perruqueiras, tecedoras, cociñeiras, no servizo doméstico, como montadoras de pezas nas fábricas,  personal employers, en márketing e xestión de empresas e ata como revisoras no Orient Express!

Preguntar, escoitar, recoller datos, e, por suposto, poñelas en valor! Con elas abrimos dende a biblio a exposición dos fondos que nos falan deses camiños e esperanzas, desas historias que falan de nós, do noso pasado. Tan importante para entender o presente!

 

 

A asasina

Neste tempo de Entroido, o último libro que lemos no club de lectura de maiores levounos á Grecia de principios do século XX, concretamente a unha illa onde a miseria está á orde do día, onde sobrevivir é complexo. E este escenario tan alleo, non o resultou tanto ao final, pois na descripción que facía o escritor atopabamos semellanzas coa Galicia rural da primeira metade do século pasado.

Non só a descripción do entorno, da vida do día a día se parece, senón que tamén hai semellanzas na descripción desas mulleres duras, traballadoras, que loitaban e loitan por sacar ás súas familias adiante.

Todo isto forma parte dunha das grandes novelas gregas contemporáneas, A asasina, de Alexandros Papadiamandis.

Día Internacional da Muller e da Nena na Ciencia!

Mulleres científicas? Pois claro! Velaquí que traballiño tan chulo fixeron na materia de Física e Química en 2º de ESO! Cartelas cos seus nomes, para saber delas, para non esquecelas, para animar as nenas a facer ciencia! Margarita Salas, Celia Rivas, Concepción Arenal, Naamme Phipps Clark, Anna Lluch, Mª Pilar Fernández Otero, Hedy Lamarr, Mileva Maric, Lisa Heitner, Pilar Roig, Mª Inmaculada Paz Andrade, Margaret Sanger, Vandana Shiva, Erna Schneider, Ana Mª Prieto López, Marie Curie, Beulah Henry…

Nós dende a biblioteca acompañamos, sacamos fondos e visibilizamos! Falar da Muller na Ciencia é falar tamén dos obxectivos da Axenda 2030: